تاند(دوشنبه، د میزان ۲۱) د طالبانو د حملو په نتیجه کې په هلمند ولایت کې تر ۴۵۰۰ ډېرې کورنۍ مجبوره شوي چې خپلې مېنې پرېږدي او په نورو سیمو کې سرګردانه شي.

د هلمند ولایت چارواکي او مرستندویان وايي چې د طالبانو د وړمې شپې د حملو په نتیجه کې د باباجاجي (د لشکرګاه څلورمه ناحیه)، نادعلي او ناوې ولسوالۍ تر څلور نیم زره ډېرې کورنۍ مجبوره شوي چې لشکرګاه ته پناه یوسي.

ویل کېږي چې یو شمېر نورې کورنۍ ممکن د هلمند ولایت نورو سیمو ته تللې وي.

بې ځایه شوې کورنۍ، چې اکثره غړي یې ماشومان، ښځې او بوډاګان دي، نه سرپناه لري او نه خوراکي مواد.

د لشکرګاه اوسېدونکي وايي چې بې ځایه شوي خلک عاجلو مرستو ته اړتیا لري او تر شنه اسمان لاندې شپه تېروي.

طالبانو پرون وویل چې د هلمند ولایت باباجي او په نادعلي او ناوه ولسوالیو کې یې یو شمېر سیمې نیولي دي.

https://taand.net/%d9%be%d9%87-%d9%87%d9%84%d9%85%d9%86%d8%af-%da%a9%db%90-%d8%b3%d8%ae%d8%aa%d9%87-%d8%ac%da%ab%da%93%d9%87-%d9%84%d8%a7-%d9%87%d9%85-%d8%b1%d9%88%d8%a7%d9%86%d9%87-%d8%af%d9%87/

تېره شپه افغان امنیتي خواکونو د باباجي او نورو سیمو د بېرته نیولو لپاره هوايي او مځکني عملیات پیل کړل.

لومړني راپورونه وايي چې په دې بریدونو کې طالبانو ته سختې مرګ ژوبلې اوښتي دي خو د مرګ ژوبلو کره شمېر څوک نه شي معلومولی ځکه چې هم پر مځکه سخته جګړه روانه ده او هم افغان هوايي ځواک او هم امریکايی الوتکې بمباري کوي.

ویل کېږي چې د خلکو ډېر کورونه په جګړه کې نړېدلي دي. افغان ځواکونه وايي، مجبوره دي چې پر هغو کورونو ډزې وکړي چې استوګنو یې نورو سیمو ته پناه وړې او طالبان ورڅخه د سنګر په توګه کار اخلي.