تاند(سه شنبه، د میزان ۱۵) د بهرنیو چارو وزارت سرپرست حنیف اتمر په دوحه کې یوې خبري ناستې ته ویلي، طالبان باید اوربند ته چې د افغانانو غوښتنه ده غاړه کېږدي.
هغه زیاته کړې، طالبانو د خبرو په پیل سره د تاوتریخوالي کمولو ژمنه کړې وه خو د تمې خلاف تاوتریخوالی ورځ تر بلې ډېرېږي.
هغه ویلي، افغان حکومت او افغانان د اوربند په اړه د طالبانو ژمنې پوره کولو ته په تمه دي.
اتمر ټینګار کړی دی چې په دوحه کې د بین الافغاني مذاکراتو لومړۍ او اساسي موخه اوربند او بل هغه یې د سیاسي هوکړې له لارې د روانې اوږدې جګړې او تاوتریخوالي پای ته رسول دي.
نوموړي د خپلو خبرو پر دوام څرګنده کړې چې د بې ګناه ولسي وګړو د ژوند خوندیتوب ته په پام باید هر څه ژر د تاوتریخوالي پر کموالي او د میکانیزم پر جوړېدو هوکړه وشي.
اتمر داسې مهال دا څرګندونې کوي چې په قطر کې د سولې بین الافغاني خبرې دوام لري خو په افغانستان کې ورځ تر بلې د طالبانو تاوتریخوالی زیاتیږي.