تاند ( سه شنبه، د میزان ۱۵) د ننګرهار د صنعت او سوداګرۍ رئیس محمد حسن محسن وایي، چې د دې ولایت په شېخ مصري ښارګوټي کې د وسپني ویلي کولو او سیخ جوړولو په ۱۵ فابریکو کې ۶۵۰ تنو ته کاري زمینه برابره شوې ده.
محسن زیاتوي، اوسمهال په ياده سیمه کې د سیخ جوړولو ۴ او د وسپنې ویلي کولو ۱۱ فابریکې فعالیت کوي.
هغه زیاتوي، د وسپني د ویلي کولو فابریکې ۳۰۰ ټنه او د سیخ جوړولو فابریکه يې ۱۸۰ ټنه سیخ تولیدوي.
نوموړی وایي، تر دې وړاندې د وسپنې خام مواد له ګاونډیو هېوادونو صادریدل، چې په ارزانه قیمت هم پلورل کېدل خو په خبره یې اوس د ویلې کېدو ترڅنګ ترې په ښه کیفیت ننګرهار کې سیخ ګول، ګاډر، ټایرنې او نور بېلابېل ودانیز او نور توکې جوړیږي.