تاند(چهارشنبه، د میزان ۹) سعودي عربستان وایي په ایران کې یوه روزل شوې ترهګریزه ډله یې نیولې ده.
د سعودي عربستان حکومت وایي یوه لس کسیزه ډله یې نیولې ده، چې وسلې او چاودېدونکي توکي یې لرل.
نوموړی حکومت وایي چې دغه ډله د ایران د سپاه پاسداران له لوري په سعودي عربستان کې ترهګریزو بریدونو د ترسره کولو لپاره روزل شوې وه.
د یاد هیواد حکومتي چارواکي وايي چې ایران په دغه ډول کړنو غواړي د دوی هېواد ناامنه کړي.
د ایران د بهرنیو چارو وزارت بیا پر دې څرګندونو غبرګون ښودلی او د سعودي عربستان ادعا یې بې بنسټه بللې ده.
ایران وايي عربستان تکراري او بې مانا څرګندونې کوي او په دې توګه به خپلو موخو ته ونه رسېږي.