تاند ( جمعه، د میزان ۴) د هند په کورني کرکت آی پي اېل کې شپږمه لوبه کې کېنګزاليون پنجاب لوبډلې د ۹۷ منډو په توپير رایل چلېنجرزبنګلور لوبډلې ته ستره ماتې ورکړه.
دا په روانو لوبو کې د پنجاب لوبډلې لومړنۍ بریا ده چې ترلاسه کوي يې.
په یاده لوبه کې لومړی توپ وهنه د پنجاب لوبډلې وکړه، چې د لوکېش راهول د سليزي په مټ يې سيالې لوبډلې ته د ۳ لوبغاړو په سوځيدو ۲۰۶ منډو هدف وټاکه.
لوکش راهول لومړی لوبغاړی شو چې په ديارلسم پړاو ای پي ايل سياليو کې سليزه جوړوي.
نوموړې د ۷ شپږيزو او ۱۴ څلوريزو په مټ په ۶۹ توپونو باندې ۱۳۲ ناسوځيدلې منډې جوړې کړې.
د ده تر څنګ اګروال ۲۶ او پورن ۱۷ منډې تر لاسه کړې.
په مقابل کې د بنګلور لوبډله د هدف په پوره کولو کې پاتې راغله او د ټولو لوبغاړو په سوځيدو يې يوازي ۱۰۹ منډې جوړې کړې.
د ای پي ايل سياليو په اوومه لوبه کې نن ماښام شپږ نيمې بجې چنای سوپرکېنګ د ډهلې کپيټلز لوبډلې پر وړاندې لوبه کوي.