تاند(یکشنبه، د سنبلې ۳۰) د سولې له خبرو سره سم په افغانستان کې د تاوتریخوالي ډېرېدل د جدي اندېښنې وړ دي.
نیویارک ټایمز ورځپاڼې د بین الافغاني خبرو له پیل راهیسې تر دې دمه په افغانستان کې امنیتي وضعیت ته کتنه کړې ده وايي چې په دغه هېواد کې تاوتریخوالی ډېر شوی دی.
د افغانستان لپاره د اروپايي ټولنې استازي رونالډ کوبیا دغه ورځپاڼې ته ویلي چې د وروستیو پنځو اوونیو تاوتریخوالی په تېرو پنځو کلونو کې بې مخینې و.
نیویارک ټایمز وایي، وسله والو طالبانو د فشار راوستلو په موخه په خپلو جګړه ییزو تاکتیکونو کې بدلون راوستی او له امله یې تلفات ډېر شوي دي.
په ورته وخت کې په افغانستان کې د مېشتو امریکايي ځواکونو ویاند هم رسنیو ته ویلي چې په وروستیو ورځو کې د دوی پر دوو نظامي اډو دوولس توغندي لګېدلي دي.
دوی زیاتوي چې په دې اړه پلټنې پیل شوې خو که ثابته شي چې دا کار د طالبانو دی نو دا د یادې ډلې له لوري د سولې د هوکړې ښکاره سرغړونه ده.
دا خبرې داسې مهال کیږي چې، تیره اونۍ د افغان حکومت او طالبانو ترمنځ بین الافغاني خبرې په قطر کې پیل شوي چې تر اوسه کومې نتیجې ته رسیدلې نه دي.