تاند ( سه شنبه، د سنبلې ۲۵) په ملګرو ملتونو کې د افغانستان دایمي استازې عادله راز وایي، چې افغانستان د لومړي ځل لپاره د ملګرو ملتونو د ښځې مقام د کمېسیون غړیتوب خپل کړی دی.
عادله راز زیاتوي، چې دا یو مهم نړیوال کمېسیون دی، چې افغانستان به یې د څلورو کلونو لپاره غړیتوب ولري.
د معلوماتو له مخې یاد کمیسیون د ښځو د حقونو او جنسیتي تبعیض د له منځه وړلو او همدا راز د مېرمنو د ژوند په ښه کولو او وده کې فعالیت کوي.
د دغه کمیسیون د غړیتوب لپاره افغانستان، چین او هند سیالي کوله، چې په پایله کې افغانستان د ملګرو ملتونو له غړو هېوادونو ۵۴ رایې خپلې کړې دي.
په ملګرو ملتونو کې د افغانستان د دایمي استازې عادله راز په خبره دوی به په ملګرو ملتونو کې د افغان مېرمنو د ژوند ښه کولو لپاره خپلې مبارزې او هڅې دوامداره ساتي.
دا په داسې حال کې ده، چې افغان ښځینه فعالانې وایي، چې یوځل بيا په هېواد کې د میرمنو د ځورونې او د دوی پر وړاندې د زور زیاتي پېښې ډېرې شوې دي.