تاند ( سه شنبه، د سنبلې ۲۵) د ننګرهار ولایت چارواکي وایي، چې په جلال اباد ښار کې نن سهار د ملي امنیت د کارکوونکو پر موټر د سړک غاړې ماین چاودنه کړې ده.
د والي ویاند عطاالله خوږیاڼي تاند وېب پاڼې سره په خبرو کې وویل، چې په دې چاودنه کې د ملي امنیت یو سرتېری وژل شوی او درې نور ټپيان شوي دي.
خوږیاڼی زیاتوي، چې تر دې دمه د پېښې په تړاو څوک نه دي نيول شوي خو وایي، په اړه یې څېړنې روانې دي.
د نوموړي په خبره د ټپيانو وضعیت ښه دی او اوسمهال تر درملنې لاندې دي.
دا په داسې حال کې ده، چې په دې وروستیو کې د سړک غاړې ماین چاودنې د هېواد په ګڼو ولایتونو ډېرې شوې دي، چې وخت ناوخت ملکي وګړو او امنيتي ځواکونو ته پکې مرګ ژوبه اوړي.
د دې پېښې مسولیت تراوسه چا نه دی منلی.