تاند، سه شنبه د سنبلې ۱۸مه: طالبان وايي د افغانستان حکومت له لوري د زندانیانو د خلاصون لړۍ لا هم نه ده پشپړه شوې.
د طالبانو د قطر دفتر نوي ویاند ډاکتر نعیم وردک د دوشنبې په شپه په یوه ټویټ پیغام کې ویلي، تر دې دمه د زندانیانو د خوشې کولو پروسه نه ده تکمیل شوې او چې دا پروسه بشپړه شي د طالبانو مذاکره کوونکی پلاوی خبرو ته تیار دی.
د ښاغلي وردک په خبره اوسمهال د بندیانو پر خوشې کولو خبرې روانې دي او هیله ده چې ژر یوې پایلې ته ورسېږي.
تر اوسه پورې د اسلامي امارت د بندیانو د خلاصون پروسه نه ده نهائي شوې، د څه بندیانو خلاصون لا هم پاتې دی، چې کار پرې روان دی.
کله چې د بندیانو د خلاصون پروسه تکمیل شي، زمونږ مذاکراتي ټیم د بین الافغاني مذاکراتو د پیل لپاره تیار دی.
— Dr.M.Naeem (@IeaOffice) September 7, 2020
نوموړي په دې هکله پوره جزیات نه دي ورکړي، چې د حکومت په بند کې ددوی څو کسان بند پاتې دي.
تر دې وړاندې حکومت او طالبانو داسې اعلامیې خپرې کړې وې چې د بندیانو د خلاصون لړۍ بشپړه شوې او په نږدې وخت کې به خبرو ته سره کیني.
ټاکل شوې حکومت او طالبان په نږدې راتلونکي کې بین الافغاني مذاکرات پیل کړي، خو تر اوسه یې دقیقه نېټه نه ده په ډاګه شوې.
نوموړي دا څرګندونې داسې مهال کړي چې حکومت د طالبانو شپږ تنه بندیان قطر ته لیږلي او ویل کېږي چې هلته به د افغانانو د خپلمنځي خبرو تر بشپړېدو نظربند وي.
د راپورونو له مخې یاد شپږ کسان د طالبانو هغه بندیان دي چې فرانسې او استرالیا یې د نه خوشې کېدو غوښتنه کړې وه.
حکومت تر اوسه د طالبانو ددې ادعا په هکله څه نه دي ویلي.