تاند (پنج شنبه، د سنبلې ۶) د المان لومړۍ وزیرې انګیلا میرکل او د ناټو عمومي منشي ینس سټولټنبرګ په ګډه نن یوې خبرې ناستې ته وویلي په پام کې ده، چې د راتلونکې اوونۍ د پنجشنبې په ورځ د اروپایي ټولنې د بهرنیو چارو وزیرانو غونډه ترسره شي.
دوی ویلي، چې په دې ناسته کې به د افغانستان، بیلاروس او مدیترانې پر وضعیت خبرې وشي.
سټولټنبرګ زیاته کړې، چې اروپایي ټولنه په مدیترانې، بیلاروس او افغانستان کې د روان وضعیت په اړه اندېښمنه ده.
هغه دغه راز ویلي، دوی د یونان او ترکیې ترمنځ د راټوکېدلیو ستونزو حل ته هم سترګې په لاره دي.
دغه راز په دې خبري ناسته کې انګلا میرکل ویلي، چې دا د نورو موضوعاتو تر څنګ د دې پلوي ده چې د افغانستان پر وضعیت هم رغوونکی بحث وشي.
دا په داسې حال کې ده، چې په دې وروستیو کې د افغانستان په یوشمېر ولایتونو کې امنیتي وضعیت خورا اندېښمنوونکی بلل شوی دی.