تاند، یکشنبه، د اسد ۲۶مه: د افغانستان انلایز ویبپاڼې په یوه مقاله کې لیکلي، په افغانستان کې روان تاوتریخوالی نه دی کم شوی، یواځې د جګړې سیمې بدلې شوې او د معلوماتو په خپرولو کې محدودیت راغلی دی.
دغې آنلاین رسنۍ په خپله خپره کړې مقاله کې په افغانستان کې د روانې جګړې له کبله ملکیانو ته د اوښتې مرګژوبلې په اړه معلومات خپاره کړي دي.
سرچینه زیاتوي په قطر کې د امریکا او طالبانو ترمنځ د شوې هوکړې په لاسلیک سره په افغانستان کې د جګړې په کچه کې کموالی نه دی راغلی او نه هم ملکي مرګ ژوبله کمه شوې ده.
د سرچینې په خبره د ۲۰۱۹ز کال په لومړۍ نیمايي کې په افغانستان کې ۳۸۱۲ ملکیانو ته مرګ ژوبله اوښتې چې د ۲۰۲۰ز کال د همدې مودې مرګ ژوبله بیا ۳۴۵۸ ده.
د افغانستان آنلایز ویبپاڼې د معلوماتو له مخې په تاوتریخوالي کې هېڅ ډول کموالی نه دی راغلی.
په دغه خپره شوې مقاله کې راغلي فرق یوازې دا دی چې ناټو او امریکایي چارواکي د جګړې معلومات نه خپروي او دغه راز د طالبانو په شمول په جګړه کې ښکلیو ډلو د جګړې سیمې بدلې کړي دي.
د مقاله په یوه برخه کې ویل شوي، افغانانو چې د سولې هوکړې په هکله څومره هیلې لرلې ګټوره نه ده ثابته شوې.
دا په داسې حال کې ده چې په دې وروستیو کې د امنیتي ځواکونو سربېره په روانه جګړه کې ډیری ملکیانو ته هم زیاته مرګژوبله اوړي.