تاند(شنبه، د اسد ۱۸) د پکتیکا د برمل ولسوالۍ په مرغې سیمه کې له وړمې ورځې راهیسې پاکستاني ځواکونو ۲۰ راکټونه ویشتلي دي.
د برمل ولسوالۍ اوسیدونکي وایي چې پاکستاني ځواکونو له تېرو څلورو ورځو راهیسې د برمل ولسوالۍ پر مرغې سیمه راکټي بریدونه کوي چې پرون ماښام یې بیا بریدونه پیل کړي دي.
دوی وايي، چې وړمه ورځ د پاکستاني ځواکونو د بریدونو له کبله اووه ملکي وګړي هم ټپیان شوي دي. ۲۰۳ تندر قول اردو د پاکستاني ځواکونو د تازه راکيټي بریدونو په اړه ناخبري ښیي خو وایي چې وړمه ورځ د برمل ولسوالۍ پر مرغې سیمه پاکستاني ځواکونو اووه راکټونه ویشتلي او له کبله یې درې ملکي وګړي ټپیان شوي دي.
د تندر قول اردو ویاند ایمل مومند وایي چې سیمه کې امنیتي ځواکونو ته د تیارسۍ امر هم شوی دی.
د یوه بل خبر له مخې پاکستاني ځواکونو له تېرو دوو ورځو راهیسې د کونړ پر دانګام ولسوالۍ ۶۵ د توپونو مرمۍ ویشتي چې ګڼ څاروي یې وژلي او مالي زیانونه یې اړولي دي.