تاند (شنبه، د اسد ۱۸) د کابل په شکردرې ولسوالۍ کې د دغه ولایت په والي محمد یعقوب حیدري وسله وال برید شوی چې خپله ترې روغ وتلی خو یو امنیتي سرتیري پکې وژل شوی دی.
د کابل د والي ویاند ناصر مهري وايي، په شکردرې ولسوالۍ کې د طالبانو ډلې اړوند کسانو د جمعې په مازدیګر په محمد یعقوب حیدري د هغه کورته نږدې سیمه کې برید وکړ، چې نوموړي ته کوم زیان نه دی رسېدلی.
د کابل د والي ویاند وویل چې د ښاغلي حیدري کور په شکردرې ولسوالۍ کې یوه غره ته نږدې موقعیت لري چې طالبانو د هغه د نښه کولو په موخه په غره کې موضع نېولې وه.
هغه زیاته کړه د برید پر مهال امنیتي ځواکونو په سیمه کې شتون درلود چې طالبانو سره په نښته کې یو عسکر ووژل شو.
د کابل د والي ویاند وویل چې په دغه برید کې طالبانو ته هم مرګژوبله اوښتې ده، خو هغوی ته یې د اوښتې مرګژوبلې په اړه معلومات ور نه کړل.
طالبانو تر اوسه په دې اړه څه نه دي ویلي.