تاند- بریتانیايي ورځپاڼو راپور ورکړ چې د دغه هیواد موزیم (بریټش موزیم) غواړي چې له افغانستان او عراق څخه لوټ شوي او بریتانیا ته وروړل شوي لرغوني اثار بېرته دغو هیوادونو ته وسپاري.
مېل ورځپاڼې نن /دوشنبه/ په یوه راپور کې ویلي چې بریټش موزیم د بریتانیا له سرحدي ځواکونو او د قانون له نورو نافذوونکو ادارو سره کار کوي چې بریتانیا ته په غیرقانوني ډول وروړل شوي لرغوني اثار خپلو اصلي هیوادونو ته بېرته ولېږي.
د دغو لرغونو اثارو په منځ کې، چې ټاکل شوې ده بېرته خپل اصلي هیواد ته ورکړل شي، د ګندهارا تمدن مجسمې هم شاملې دي چې له افغانستان څخه لوټ شوي او د ۲۰۰۲ م کال د سپټمبر په ۵ نېټه په غیرقانوني ډول له پېښور څخه بریتانیا ته وړل شوي او د لندن په هیترو هوايي ډګر کې کشف او ضبط شوي دي.
په همدې حال کې د بریتانیا بلې ورځپاڼې ګارډین لیکلي چې دا مجسمې به افغانستان ته تر لېږلو وړاندې په لندن کې نندارې ته کېښودل شي.
د ورځپاڼې د راپور پر اساس، دا مجسمې غالباً د دې لپاره چې طالبانو ماتولې، د کابل له موزیم څخه ایستل شوي او په
لرګینو کرېټونو کې بریتانیا ته قاچاق شوې دي.
بریټش موزیم نن /دوشنبه/ اعلان وکړ چې دا تر ټولو مهم لرغوني اثار دي چې دوی یې خپلو اصلي هیوادونو ته بېرته ورګرځوي.
د دغو اثارو په منځ کې د ګندهارا د یونیم زر کاله پخواني تمدن ۹ مجسمې هم شته.
بریتانیا په تېرو کلونو کې سلګونه لرغوني اثار افغانستان ته بېرته سپارلي دي.