محمدمعصوم هوتک
بیا نازل سو پر پښتون د غـــم سورسات
بیا لښکر ســو د مــرگي باندي رامات
نن بیا بله بگړۍ ولـــوېده له ســـره
مــرگي واخیست له ژوندونه بیا کسات
د ادب د لارویانـو له ټـــولیه
یو بل دروند تن سـو کنډو افسوس هیهات
له تدریسه چې مــــوندلی ډېرو فیض وو
زه ئې هم په شاگـردۍ کــړم مباهات
ټول کړه وړه، فکر و عــمل ئې د پښتون وو
وقف کـــړی ئې وو پـــوهي ته حیات
زمانه راته له خښـــمه ســـره و شنه ده
ته وا زړه ئې نه ســـړیږي پــــه ممات
و تاریخ ته ئې د مړیني وم چـــورت وړی
په دې فرد کې ځان څرگند کــړ په اثبات
زړه د “ویر” دوه واره ولوېد”اه” ئې وخوت
” پښتونزوی حبیب الله جاج ســو وفات”
ـــــــــــــــــــــــــــــــــــــــــــــــــــــــــ
حل : وروستۍ مصرع تاریخي ماده ده چي ابجدي ارزښت ئې ۱۴۲۳ کېږي. د (ویر) زړه (ی) دئ چي دوه واره سي (۲۰) لاس ته راځي. د (اه) ارزښت (۶) دئ. دواړه (۲۶) کېږي. دغه عدد چي د (ولوېد) او (وخوت) په قرینه له (۱۴۲۳) څخه منفي سي، ۱۳۹۷ پاتېږي او دا د ارواښاد حبیب الله جاج پښتونزوی د وفات کال دئ.