تاند- دا خو ټولو ته څرګنده ده چې د کتاب لوست ډېرې ګټې لري خو په یوه تازه څېړنه کې ښکاره شوې چې د مطالعې عادت د انسان عمر زیاتوي.
د امریکا د یل پوهنتون څېړونکو په خپلو څېړنو کې، چې ۱۲ کاله یې دوام وکړ، څرګنده کړه چې مطالعه د انسان ستړیا او تشویشونه کموي او په نتیجه کې یې د انسان عمر اوږدوي.
په دې څېړنه کې معلومه شوې چې د کتابونو لوستل اندېښنې په سلو کې ۶۸ کمولی شي.
پر دې سربېره د کتاب لوستلو عادت د انسان عصابو ته ارامښت او ځانګړی سکون بخښي او حتي اغېز یې په ازاده هوا کې تر پلي تګ هم زیات دی.
د څېړنې پایلې ښيي چې مطالعه د انسان د زړه، فلج او د وینو د رګونو یا شریانونو د بېلابېلو ناروغیو په مخنیوي کې مهم رول لوبوي.
د دې څېړنې پر اساس مطالعه د انسان په ذهن کې د تفکر وړتیا زیاتوي.
د یل پوهنتون څېړونکي وايي، کوم کسان چې د ورځې نیم ساعت یا په اوونۍ کې ۱۲۰ دقیقې مطالعه کوي، د نورو خلکو په پرتله په هغوی کې تر مودې مخکې مړینې په سلو کې ۲۳ کمې وي.
تر دې پخوا په ګڼو څېړنو کې ثابته شوې وه چې مطالعه د الزایمر یا هېرې د ناروغۍ تر ټولو ښه دوا ده.