د زمري، اسد ۰۹  مه  ۱۳۹۹

رفيع الله مندوخېل، اسلام اباد

سپین بولدک ته نژدې د بلوچستان ایالت په چمن کې د افغان کډوالو، ځايي اوسېدونکو او سرحدي ځواکونو ترمنځ اخ و ډب شوی چې په نتيجه کې يې د يوې مېرمنې په شمول درې تنه وژل شوي او شل نور ټپيان شوي دي. که څه هم د چمن حکومتي چارواکيو تراوسه د مرګ ژوبلې په اړه څه نه دي ويلي، خو د پولې د تړلو پر ضد د روران پرلت او احتجاج کوونکو مشر او د چمن د روغتون مسوول د درېو تنو مړينه تاييد کړې ده.

د چمن د پرلت يا احتجاج مشر اسلم اڅکزی وايي، پر باب دوستي د تلونکو افغان کډوالو، احتجاج کوونکو او سرحدي ځواکونو ترمنځ هغه مهال اخ و ډب پیل شو چې د دوو ورځو لپاره پرانيستل شوې پوله ناڅاپه د خلکو پر مخ وتړل شوه. پرون د چارشنبې په ورځ حکومت اعلان کړی و چې د چمن او سپين بولدک ترمنځ پوله به د ښه نيت له مخې د دوو ورځو لپاره پرانيستل کېږي. د خبر له خپرېدو سره سم زرګونه افغان کډوال د چمن باب دوستي ته ورسېدل څو پر ډیورند کرښه واوړي او راتلونکی اختر له خپلو کورنيو او خپلوانو سره ولمانځي. خو نن د پنچشنبې ورځې په نيمايي کې پرته له کوم اعلان څخه دروازه د خلکو پر مخ وتړل شو چې وروسته بيا خلکو په احتجاج لاس پوري کړ، احتجاج کوونکو پر پوله جوړ شوي کرنتين مرکز ته اور ورته کړ او د امنيتي سرتېرو په ډزو کې تر دې مهاله درې تنه وژل شوي او شل نور ټپيان شوي دي چې د چمن روغتون ته وړل شوي دي.

ګڼو سیاستوالو د پاکستان د امنیتي او سرحدي ځواکونو له لوري له بې وسلې مسافرو سره تشدد غندلی دی.

د پښتون ژغورنې غورځنګ یوې مشري ثنا اعجاز پر خپله ټویټرپاڼه لیکلي  چې د پاکستان د وسله وال پوځ له لوري پر عامو پښتنو د دې برید او په نتیجه کې یې د ګڼو بېګناه خلکو د مرګ ژوبلې په اعتراض کې پښتون ژغورنې غورځنګ په ټوله جنوبي پښتونخوا احتجاج کوي.

په عين حال کې سلګونه کسان پر پوله تېر شوي هم دي، خو د مېرمنو او ماشومانو په ګډون ډېری لاهم پر پوله ايسار پاتي دي.

د تورخم او چمن لارې د تېرې مارچ مياشتې په لومړۍ اوونۍ کې د کوویډ نولس ويروس د خپرېدو احتمالي خطر ته په پام تړل شوې وې. په چمن کې له تېرو څو اوونيو راهيسې د ځايي تجارانو له لوري د پولې د تړلو پر ضد احتججا ج دوام درلود.