تاند ( پنج شنبه، د اسد ۹) د کندهار یوې امنیتي سرچینې د نوم نه خپریدو په شرط رسنیو ته ویلي، چې د دې ولایت سپين بولدک او چمن ترمنځ د وېش پردروازه د افغان سرحدي ځواکونو او پاکستاني پوځيانو ترمنځ سخته نښته روانه ده.
سرچینه وایي نښته نن ماښام شاوخوا ۷ بجې هغه مهال پيل شوه کله ، چې پاکستانيو ملېشو پرافغان کمیسارۍ ډزۍ وکړې.
د سرچینې په خبره افغان سرحدي ځواکونود پاکستانیو ملېشوسخت ځواب ورکړی او اوس هم نښته روانه ده .
هغه ویلي، چې د پولې دې غاړې ته د پاکستانیو ملېشو په ډزو کې دوه مسافر وژل شوي او شاوخوا ۲۰ نور ټپیان دي.
دغه نښته وروسته ترهغه رامنځ ته کیږي، چې د فرضي پولې هغه غاړه په چمن ښار کې د پاکستاني ملېشو پر تاسیساتو یو شمیر بند پاتې مسافرو برید وکړ او له برید وروسته دواړو غاړو ته ګڼ مسافر واوښتل.
د کندهار سیمه ییزو چارواکو تراوسه په دې تړاو په رسمي ډول څه نه دي ویلي.
د راپورونو له مخې مسافرو له تیرو څو ورځو راهیسې د چمن-سپین بولدن د لارې د خلاصیدو غوښتنه کوله، خو نن یې صبر تمام شوی او پر دروازه یې د افغانستان لوري ته د اوښتو هڅه کړې ده.
ځايي خبریالان وايي، چې د کندهار امنیه قوماندان تادین خان او د سرحدي لوا قوماندان جنرال انور انبیا سپين بولدک ولسوالۍ ته رسېدلي دي.
په چمن کې هم پاکستاني ځواکونو پر عامو خلکو ډزې کړي دي.