تاند (چهارشنبه، د سرطان ۲۵) د ننګرهار په چپرهار ولسوالۍ کې نامعلومو وسله والو د یو دیني عالم په ګډون دوه کسان وژلي دي.
د ننګرهار سیمه ییز چارواکي وايي نن له غرمې وروسته نامعلومه وسله والو په چپرهار ولسوالۍ کې د یو دیني عالم په ګډون دوه کسان په ډزو وژلي دي.
د ننګرهار د والي ویاند عطاوالله خو ګیاڼی پېښه تاییدوي او وايي چې د پېښې قربانیان ټول ملکي وګړي دي.
د یو بل خبر له مخې د پروان ولایت په سیدخیل ولسوالۍ کې نن سهار ورته پېښه واقع شوې ده.
د پروان سیمه ییز چارواکي وايي چې د طالبانو پورې اړوند وسله والو د مسجد د ملا امام په ګډون دوه کسان د دغه ولایت په سیدخیل ولسوالۍ کې وژلي دي.
طالبانو تر اوسه په دې اړه څه نه دي ویلي.
دا په داسې حال کې د ه چې څو ورځې وړاندې په غزني ولایت ناپېژاندو وسله والو دوه قومي مشران په ډزو وژلي وه.
باید وویل شي چې په دې وروستیو کې په هېواد کې د دیني عالمانو، قومي مشرانو، او عامه خلکو وژنې زور اخیستی او هره ورځ لسګونه کسانو ته مرګژوبله اوړي.