تاند- ساینسپوهان وايي چې دوی اوس تقریباً معلومه کړې چې د انسان په جین کې کوم بدلونونه د دې سبب کېږي چې د سینې یا تي سرطان رامنځته شي.

د ښځو د سینې یا تي سرطان د سرطانونو په منځ کې تر ټولو عام او زیات دی.

د ساینسپوهانو له لوري دا پرمختګ، چې جزییات یې په نېچر مجله کې خپاره شوي، د دې ناروغۍ د درملنې او مخنیوي لپاره یو لوی ګام بلل شوی دی.

ویل شوي چې دا د سینې د سرطان په برخه کې تر ټولو لویه او پراخه څېړنه ده او هغه ټول معلومات پکې شامل دي چې په وجه یې د روغې سینې انساج خرابېږي.

د بریتانیا د سرطاني ناروغیو د څېړنې مرکز وايي چې دا تازه موندنې د سرطان د درملنې لور ته یو مهم ګام دی.

ساینسپوهان وايي، د دې لپاره چې د دې ناروغۍ په علت پوی شي باید لومړی دا څرګنده کړي چې په ډي این اې کې څه ستونزه پېښېږي چې له کبله یې د انسان روغ انساج سرطاني کېږي.

ساینسپوهانو په دې څېړنه کې د ۵۶۰ تنو د سینې د سرطان بېلګې کتلي دي.