تاند ( سه شنبه ، د سرطان ۱۷) د کونړ د ولایت ویاند عبدالغني مصمم وایي تیره شپه د ډیورنډ فرضي کرښې ۷۰۰ متره دیخوا یوه پاکستانۍ جاسوسه الوتکه غورځیدلې ده.
مصمم وایي دا الوتکه د سرکاڼو ولسوالۍ د ګلاب پړۍ په سیمه کې رالوېدلې ده او زیاتوي د لویدو علت یې لا معلوم نه دی.
خو بل لورته کونړ کې یو شمیر سرچینو تاند وېب پاڼې ته وویل،چې افغان او پاکستاني جنګیاليو د کونړ ولایت اړوند سیمه کې نښته کړې ده .
سرچینې زیاته کړه، چې نښته تیره شپه د سرکاڼو ولسوالۍ کې شوې ده.
سرچینه زیاتوي په دې جګړه کې ۲۰ پاکستاني پوځیانو د لشکر طیبه ډلې په مرسته د غورځیدلې الوتکې لټون پيل کړی وو،چې د افغان ځواکونو له مقاومت سره مخ شول.
په دې نښته کې دواړو لوریو ته د مرګ ژوبلې په اړه تراوسه څه نه دي ویل شوي.