خبریاله: عاقله اسد(سه شنبه، د سرطان ۱۷) ولسمشر محمد اشرف غني ویلي دي، که طالبان جګړې ته دوام ورکړي د افغانستان د سولې پروسه به له جدي ننګونو سره مخامخ شي.
د هغه په وینا، د طالبانو لخوا دوامداره تاوتریخوالی د سولې په اړه ملي اجماع کمزورې کوي.
ښاغلي غني دغه څرګندونې پرون (دوشنبه ، د سرطان ۱۶) په کابل کې د سیمې د هیوادونو له استازو سره په مشورتي ناسته کې د وینا پر مهال وکړې.
ولسمشر غني زیاته کړه، د تاوتریخوالي اوسنۍ کچه د تیرو کلونو په پرتله لوړه ده، او که همداسې دوام وکړي د سولې پروسه به له ننګونې سره مخ شي.
هغه د ملګرو ملتونو وروستي راپور ته په اشارې وویل چې طالبانو تراوسه خپل مسؤلیتونه نه دي ادا کړي او په تروریستي شبکو پورې تړلي دي.
ښاغلي غني وړاندیز شوی اوربند، د هر اړخیز مذاکراتي ټیم جوړیدل، د ملي پخلاینې عالي شورا رامینځته کول او د “قوي ملي اجماع” رامینځته کول د سولې د لاسته راوړلو لپاره د افغان حکومت د ګامونو په توګه یاد کړل.
هغه وویل:
“موږ په سیمه کې ستر ګامونه اخیستي دي ترڅو چې طالبان له تاوتریخوالي لاس واخلي، موږ بندیان خوشې کړي او د مستقیمو خبرو د پیل ژمنه مو کړې. دا په دې موخه چې دوی به د اورکم منلو ته دوام ورکړي ترڅو زموږ لپاره د کورونا ویروس سره د مبارزې لپاره غوره شرایط برابر کړي، مګر بدبختانه چې د افغانانو په وړاندې تاوتریخوالی ډیر شو.”
غني له افغانستان سره د سیمه ییزې همکارۍ پر اهمیت ټینګار وکړ او زیاته یې کړه چې افغانستان د سیمه ییزې همکارۍ د یوې برخې په توګه کولی شي د سیمه ییز ثبات او هوساینې لپاره ښه رول ولوبوي. هغه زیاته کړه: “زموږ لید دا دی چې افغانستان د هوساینې او ثبات مرکز شي ، د سیمې د پرمختګ او ودې لپاره یوه لاره ده.
ښاغلي غني وویل چې افغانستان د جګړې پای ته رسولو لپاره سیاسي اراده لري او د تاوتریخوالي پای ته رسولو لپاره یې سیاسي حل لاره وړاندې کړې وه. د ده په وینا، د جنګ پای ته رسیدو لپاره نړیواله اجماع شته او د قوي سیمه ییزې اجماع لپاره د سیمې او ګاونډیو هیوادونو ملاتړ به افغانستان سره مرسته وکړي چې د سولې اهدافو ته ورسیږو.
د سولې او بین الافغاني خبرو اترو په اړه د “سولې لپاره د اجماع پیاوړتیا” تر عنوان لاندې د سیمې د هیوادونو مشورتي ناسته پرون د ولسمشرۍ په ماڼۍ کې جوړه شوه. په غونډه کې د سیمې د شاوخوا ۲۰ هیوادونو استازو ، د افغانستان ستراتیژیکو ملګرو او ملګرو ملتونو برخه اخیستې وه. د سه شنبه او پنجشنبه په ورځ ، کابل د سولې پروسې او نړیوالو خبرو اترو په اړه د سیمه ییزې او نړیوالې اجماع په هکله د درې نورو درې اړخیزو او دوه اړخیزو سیمه ییزو غونډو کوربه دی.
د بهرنیو چارو وزارت په وینا، د پنجشنبې په ورځ به د افغانستان، پاکستان او چین ترمنځ درې اړخیزه ناسته او د سیمه ییزې ناستې کوربه وي. دې ناسته کې به د افغانستان لوی نړیوال همکاران او هغه هیوادونه برخه واخلي چې په تیرو ۱۹ کلونو کې یې د امنیت او اقتصادي شرایطو کې یې د افغانستان ملاتړ کړی.