تاند (پنج شنبه، سرطان ۱۲) هرات کې د ممیزو د پروسس او بسته بندۍ لومړنۍ فابریکه پرانیستل شوه
په هرات ولایت کې د پینځه سوه زره امریکايي ډالرو په ارزښت د ممیزو د پروسس او بسته بندۍ لومړنۍ فابریکې په فعالیت پیل وکړ.
دغه فابریکه نن پنج شنبه د هرات د والي په حضور د صنعت کارانو او خصوصي سکتور فعالینو له لوري پرانیستل شوه.
په راپور کې راغلي چې یاده فابریکه د ورځې له ۲۰ تر۲۲ ټنو پورې د ممیزو د پروسس وړتیا لري.
د دې فابریکې په فعالیت سره یوسل او پنځوسو کسانو ته د کار زمینه برابره شوه.
ویل کیږي چې ددې کارخونې په فعالیت سره به په کال کې د هرات د ممیزو د صادراتو کچه له ۲۵۰۰ ټنو څخه ۳۵۰۰ ټنو پورې ورسیږي.
د یادونې وړ ده چې د داسې فابریکو رامنځته کېدل به نه یواځې بهر ته د کورني تولیداتو د صادراتو کچه لوړه کړي؛ بلکې په سلګونه خلکو ته به کاري فرصتونه برابر کړي.