تاند (جمعه، د سرطان ۶) راپورونه ښيي چې د کابل ښار د احمدشاه بابا مېنې په یوه مارکېټ کې اور لګېدلی چې د دې خبر د خپرېدو تر شېبې دوام لري.
د کابل امنیه قومانداني تایید کړه چې د ښار په دوولسمې امنیتي حوزې پورې اړوند د احمدشاه بابا مېنې د سلیم کاروان بلاکونو ترڅنګ په مارکیټ کې اور بل شوی دی.
تراوسه پورې د اورلګېدو له کبله د سر و مال د تاوانونو په اړه څه نه دي ویل شوي خو شاهدان وايي چې د اور لمبې ډېرې لوړې دي او باور لري چې ډېر تاوان به یې اړولی وي.
د کابل د امنیه قوماندانۍ ویندوی فردوس فرامرز رسنیو ته وویل، د پېښې ځای ته اوروژونکي رسېدلي او هڅه کوي چې اور مړ کړي.
تراوسه د اورلګېدو د علت په اړه څه نه دي ویل شوي. دا هم نه دي ویل شوي چې په مارکیټ کې، چې اور پرې بل دی، څه ډول مواد پلورل کېږي.
د کابل په مارکیټونو په تېره بیا منډيي کې په ځلونو اور لګېدلی او هر ځل یې د ملیونونو افغانیو زیان پېښ کړی دی.
تراوسه اکثره پېښې د برېښنا د شارتۍ له کبله رامنځته شوې دي.