تاند، جمعه، د سرطان ۶ مه: د امریکا د ولسمشر ډونالډ ټرمپ د ملي امنیت د شورا پخواني سلاکار جان بولټن د ولسمشر ټرمپ په اړه د خپلو خبرو کلکه ننګه کړې او ټرمپ یې خطرناک بللی دی.
ښاغلي بولټن په دې وروستیو کې یو کتاب چاپ کړ او په کې یې د ټرمپ په اداره کې د خپلو شاوخوا ۱۸ میاشتو د تجربو او ځینو نورو هغو مسایلو او پېښو په اړه معلومات خپاره کړل چې د مطبوعاتو او خلکو له سترګو پناه وو.
جان بولټن (د کتاب بشپړ متن) وايي، ټرمپ له افغانستانه ټول ځواکونه ایستل
د بولټن د کتاب نوم «هغه خونه چې دا هرڅه په کې پېښ شول» دی.
نوموړي د دغه کتاب په اړه ځانګړې مرکه کې ولسمشر ټرمپ بدخویه شخص یاد کړ او زیاته یې کړه هغه چې څه ډول پرېکړې کوي، خطرناکه دي.
ښاغلي بولټن د امریکا د سیاسي غلیمانو ایران او شمالي کوریا سره د ولسمشر ټرمپ په چال چلند هم انتقاد وکړ: “ټرمپ دوامداره هلې ځلې کوي چې د ایران (د مذهبي مشر) ایت الله سره خبرو ته کیني، هاغسې چې د شمالي کوریا له مشر کیم جونګ اون سره خبرو ته کیناست. “
بولټن: چلباز خلیلزاد طالبانو سره د اړیکو پټ کانال درلود او دوی ته یې لوی امتیازات ورکړل
ښاغلی بولټن وايي د هغو “ځوروونکو”خبرو اترو شاهد و چې ولسمشر ټرمپ په کې د چین له ولسمشر څخه وغوښتل چې د هغه په بیا ولسمشر کېدو کې مرسته وکړي.
وايي ولسشمر ټرمپ خپل چینايي سیال ته وویل د امریکا تولیدات دې وپېري چې د هغه د ګټې چانس زیات شي.
همدغه راز د ښاغلي بولټن په خبره ولسمشر ټرمپ د اویغور مسلمانانو لپاره د کمپونو د جوړولو په اړه د چین د پرېکړې ننګه وکړه او اجازه یې ورکړه چې دا کمپونه جوړ شي.
نوموړي همدغه راز د اوکراین ناندریزه مسئله هم یاده کړه او وویل چې ولسمشر ټرمپ د اوکراین له ولسمشر څخه غوښتي وو چې د خپل سیاسي سیال جوبایډن په اړه معلومات ړنګ او ورک کړي.
بولټن: ټرمپ، افغانستان روسیې ته پرېږدي، خلیلزاد طالبانو سره پټې اړیکې لرلې
امریکایي سیاستوالو د ولسمشر ټرمپ دا کار د بهرنۍ تګلارې او قانون خلاف بللی او خبره د هغه تر استیضاح پورې ورسېدله.
خو ولسشمر ټرمپ بیا بولټن تورن کړی دی چې د کتاب په خپرولو سره یې قانون مات او پټ او محرم معلومات یې خپاره کړي دي.
په همدې حال کې د امریکا د بهرنیو چارو وزیر مایک پمپیو ښاغلی بولټن خاین بللی دی او ویلي یې دي چې نیم حقیقتونه او غلط معلومات یې خپاره کړي دي.