تاند- په امریکا کې څېړونکي وايي چې د سپي په وسیله د یو ډول سرطان په پېژندلو کې بریالي شوي دي.
دې سپي (عکس) په ۳۴ تنو کې، چې سرطان یې تشخیص شوی وو، ۳۰ تنه وپېژندل چې په دې ناروغۍ اخته دي.
د دې څېړنې پایلې د امریکا د متخصصانو د ټولنې په کالنۍ غونډه کې اعلان شوې او وویل شول چې د حیواناتو شامه یا د بویونې حس خورا حیرانوونکی دی.
ویل شوي چې سپي یوازې د ترویید غدې، چې د انسان په ستوني کې ده، سرطان پېژندلی دی.
له سپو څخه د وسلو، باروتو، مخدرو موادو او ګڼو نورو شیانو په موندلو کې کار اخیستل کېږي خو دا لومړی ځل دی چې د انسان د یوې ناروغۍ په پېژندلو کې ترې کار اخیستل کېږي.
د سرطان تر ټولو خطرناکه برخه دا ده چې اکثره ډولونه یې په اسانه نه تشخیص کېږي او یا په ځڼد تشخیص کېږي. که سرطان په لومړیو مرحلو کې تشخیص شي، په اسانه یې درملنه کېدای شي خو که سرطان خپلې ريښې زیاتې وځغلوي بیا یې درملنه ګرانه او حتي ناممکنه وي.