تاند، سه شنبه، د جوزا ۲۰مه: د مزارشریف حضرت علي روضې ته د زیارت کوونکو پر ورتلو د قرنطیني بندیز له امله تر اوسه له ۱۰۰۰ څخه زیاتې کوترې له لوږې مړې شوې دي.
د روضې د ساتونکو په وینا د روضې کوترو ته به زیارت کوونکو له ځان سره دانه ور وړله او ورته به یې اچوله خو اوس د علي په روضه کې د خلکو پر تګ راتګ کلک بندیز لګول شوی دی او له همدې امله زرګونه کوترې پکې د لوږې له ګواښ سره مخ دي.
د روضې منجاوران وايي، که حکومت د کوترو د لوږې چاره ونکړي یو لوی شمېر د زیارت کوترې به نورې هم مړې شي.
د مزار شریف د روضې کوترې چې تر ډېره سپین رنګې دي، د حضرت علي روضې ته یې ځانګړې ښکلا ورکړې ده.
ددغو کوترو د لیدو لپاره به د ورځې زرګونه خلک روضې ته ورتلل او هلته به یې ورته د غنمو او نورې دانې وروړلې.
د روضې مسوولان وايي، په دغه زیارت کې له ۱۰ زرو زیاتې کوترې دي او د ورځې له یوې بوجۍ تر دریو بوجۍ دانه به ورته خلکو اچوله.
دوی وايي، د بلخ د حج و اوقاف وزارت ته یې دا موضوع رسولې ده، خو هغوی یې په اړه اقدام نه دی کړی.
د یادونې ده چې حکومت دوه نیمې میاشتې ګڼ ښارونه او زیارتونه تړلي وو، خو اوس یې د دریو میاشتو لپاره په قرنطییني بندیزونو کې نوي نرمښتونه راوستي دي.