تاند، پنجشنبه، د جوزا ۸مه: د ناټو غوڅ ملاتړ ماموریت په افغانستان کې د کورونا د تشخیص لپاره ځانګړی GeneXpert 16 لابراتوار پرانیست.
په دې لابراتوار کې ټول ټال ۳۸ تنه د ټکنیشن برخې پیاوړي کارکوونکي ګمارل شوي او وايي چې د کورونا د چټک تشخیص برخه کې به فعالیتونه ترسره کوي.
تر دې وړاندې به ناټو خپل سمپلونه له افغانستانه بهر استول او په یوه اوونۍ کې به یې نتیجه راتلله.
اوس د ناټو د لوژستیک برخې مسوولان وايي، دغه نوي لابراتوار ته د کوویډ ۱۹ ناروغۍ د تشخیص یو کیټ، د بایو فایر ۶ دستګاوې او ۴ جین ایکسپرت او (Thermo Fisher) په نوم ماشینونه راوړل شوي دي.
د ناټوپه وینا د دغه لابراتوار ټول ظرفیتي او مالي امکانات د اتریش، ناروې او امریکا لخوا ورکول کېږي.
ناټو نه دي ویلي چې ایا دا لابراتوار به یوازې د بهرنیو ځواکونو معاینات کوي که د افغان ځواکونو او عامو وګړو معاینات به هم ترسره کوي، خو دا په داسې حال کې ده چې په افغانستان کې دا مهال د کورونا نږدې ۱۳ زره پېښې تثبیت شوې دي.