تاند، پنجشنبه، د جوزا ۸مه: د حج و اوقافو وزارت د مسلکي معین امین الدین مظفري پر موټر بمي برید کې یو تن وژل شوی او درې نور ژوبل دي، خو پخپله معین ته زیان نه دی رسېدلی.
د حج و اوقافو وزارت د نشراتو رئیس فضل محمد حسیني تاند ته پېښه تاییدوي او وايي، د ښاغلي مظفري پر موټر بمي چاودنه د کاپیسا په کوهستاناتو ولسوالۍ کې کور ته پر لاره شوې ده.
د حسیني په خبره په پېښه کې د مظفري یوخپلوان وژل شوی او درې همکاران یې ژوبل دي خو پخپله معین ته ځکه زیان نه دی رسېدلی چې نوموړی د چاودنې پر وخت له موټر څخه ښکته شوی و.
تر اوسه کومې ډلې د دغې پېښې مسوولیت پر غاړه نه دی اخیستی.