تاند (جمعه، د تلې/ میزان ۳ مه) د افغانستان دفاع وزارت وايي، پرون (پنجشنبې) یې سپین بولدک ته نژدې یوې پاکستانۍ پوستې ته وروسته له هغه سزا ورکړه او له منځه یووړه چې پر افغان لوري یې دزې کولې.
دفاع وزارت په خپله رسمي ایکسپاڼه کې لیکلي د دې عملیاتو له کبله افغان امنیتي ځواکونو ته هیڅ مرګ ژوبله نه ده اوښتې او د پاکستان له لوري تبلیغات، چې ګواکي افغان ځواکونو ته په نښته کې مرګ ژوبله اوښتې، دروغ دي.
د پاکستان امنیتي سرچینو بیا ویلي چې د جمعې په ورځ د افغانستان او پاکستان ترمنځ د ګلستان په سیمه کې د افغان طالبانو څو غړي د ډزو په تبادله کې وژل شوي او نښته لا هم روانه ده. خو تر اوسه د پاکستان پوځ په دې اړه رسماً څه نه دي ویلي.
ګلستان، د بلوچستان ایالت یوه ولسوالي ده چې د افغانستان د کندهار او ښورابک ولسوالیو ته څېرمه ده.
د طالبانو حکومت د پنجشنبې په ورځ د پاکستان د هوايي بریدونو په غبرګون کې ویلي و چې «مناسب ځواب» به ورکړي. پاکستان ویلي چې د پنجشنبې په سهار یې د افغانستان په خاوره کې پر لس ځایونو بمباري کړې ده.