د طالبانو د حکومت د بهرنیو چارو وزارت په اسلاماباد کې د امریکا د سفارت د هغه بیان په غبرګون کې، چې په پاکستان کې ۴۶۳ کیلوګرامه کشف شویو میتامفیتامین د سرچینې په توګه یې افغانستان یاد کړی، ویلي چې دا ادعا بېاساسه او په سیاسي انګېزه مطرخ شوې ده.
د امریکا سفارت ویلي و چې د دغه هېواد د نشهيي توکو پر وړاندې د مبارزې ادارې «DEA» او د پاکستان د نشهيي توکو پر وړاندې د مبارزې ځواک په ګډو عملیاتو کې شاوخوا ۴۶۳ کیلوګرامه میتامفیتامین، چې ادعا شوې سرچینه یې افغانستان دی، نیولي دي. د سفارت په وینا، د دغو نشهيي توکو ارزښت شاوخوا ۲۱ میلیون ډالره و او سریلانکا ته لېږدول کېدل. په عملیاتو کې یو شمېر کسان هم نیول شوي دي.
د طالبانو د بهرنیو چارو وزارت ویاند عبدالقهار بلخي ویلي، په افغانستان کې د نشهيي توکو تولید، قاچاق او کارول بشپړ منع دي.
هغه ادعا کړې چې افغانستان د مصنوعي نشهيي توکو د تولید وړتیا هم نه لري او د ډیورند کرښې د تګ راتګ لارې له نژدې یو کال راهیسې د هر ډول تګ راتګ پر مخ تړل شوې دي.
بلخي په اسلاماباد کې د امریکا له سفارته غوښتي چې د نیول شویو نشهيي توکو سرچینه په پاکستان کې ولټوي او افغانستان دې د نورو د تبلیغاتي موخو لپاره نه کاروي.
په وروستیو کې ملګروملتو په څو راپورونو کې ویلي و چې په افغانستان کې د کوکنارو د کښت له منع کېدو وروسته د پاکستان په بلوچستان کې د کوکنارو کښت زیات شوی دی.
رموږ ګلالیو ط/البانو ته یو لنډ پیغام:
تر څو چی په رسمیت وؤ نه پېژندل شۍ خره او چرګان هم ستاسي خبرې نه اوري او نه هم غوږ ورته نیسی، او پاکستان او نور شریر هیوادونه او سازمانونه چی پر تاسي هر تور لګوي او هره مرداری ستاسي او افغانانو پر مخ تپي نو ټوله نړۍ یی ورسره منی. نو په انساني او نړیوالو معیارونو ځان برابر او د بشریت له کاروان سره د افغانی او اسلامي اصولو او ارزښتونو په ساتلو سره حرکت وکړۍ.