محمد نبي د شل اوریزو په کرکټ کې له تاریخي پړاو سره یوځای شو
د افغانستان پخوانی لوبډلمشر او تجربهکار الراونډر محمد نبي د هند پر وړاندې د شل اوریزو سیالیو په دوهمه لوبه کې د نارینه وو په نړیوال شل اوریز کرکټ کې یو تاریخي ریکارډ ثبت کړ.
نبي د هند د ډیلي په ارون جېټلي لوبغالي کې د هند په وړاندې د افغانستان په دوهمه شل اوریزه سیالي کې داسې پړاو ته ورسېد چې تر دې مخکې یوازې درې نارینه لوبغاړي ورته رسېدلي وو. هغه په نړیوالو شل اوریزو سیالیو کې د ۲۵۰۰ منډو او ۱۰۰ وېکټو دوهګونی ریکارډ بشپړ کړ.
نبي اوس د بنګلهدېش د شکیب الحسن، د زیمبابوې د سکندر رضا او د مالیزیا د ویراندېپ سېنګ ترڅنګ هغه څلورم نارینه لوبغاړی دی چې په نړیوالو شل اوریزو سیالیو کې یې لږ تر لږه ۲۵۰۰ منډې او ۱۰۰ وېکټې ترلاسه کړې دي.
د «اوټلوک انډیا» ورځپاڼې د معلوماتو له مخې، نبي تر دې پړاو وروسته په شل اوریزو نړیوالو سیالیو کې ۲۵۰۱ منډې او ۱۱۱ وېکټې لري. شکیب الحسن ۲۵۵۱ منډې او ۱۴۹ وېکټې، سکندر رضا ۳۲۴۴ منډې او ۱۱۴ وېکټې، او ویراندېپ سېنګ ۳۴۰۲ منډې او ۱۲۶ وېکټې لري.
نبي د هند پر وړاندې د لومړۍ لوبې په وروستیو کې ۳۳ منډې هم کړې وې او له عظمتالله عمرزي سره یې د ۸۳ منډو ملګرتیا جوړه کړې وه. له همدې لوبې وروسته هغه دې تاریخي پړاو ته ډېر نژدې شوی و.
سره له دې چې افغانستان له هند سره په دوهمه لوبه کې له سختې ماتې سره مخ شو، د نبي دا لاسته راوړنه د هغه د اوږدې او اغېزمنې نړیوالې لوبیزې دندې یو مهم پړاو بلل کېږي. نوموړي د کلونو په اوږدو کې د توپ اچونې ترڅنګ د منځني ترتیب په توپ وهنه کې هم د افغانستان لپاره مهم رول لوبولی دی.
افغانستان په لومړۍ لوبه کې له هند څخه په اووه وېکټو ماتې خوړلې وه، خو نبي او عمرزي د لوبډلې د منډو د زیاتولو لپاره مهمه ملګرتیا کړې وه. د دوهمې لوبې تر پیل مخکې هند د درې لوبو د لړۍ د ګټلو لپاره یوازې یوې بلې بریا ته اړتیا لرله.
د نبي دا ریکارډ د افغانستان د کرکټ لپاره ځکه هم مهم دی چې هغه د هېواد له هغو لوبغاړو څخه دی چې د اوږدې مودې لپاره یې په نړیواله کچه د افغانستان د شل اوریز کرکټ استازیتوب کړی او د توپ وهنې او توپ اچونې په دواړو برخو کې یې د پام وړ ونډه لرلې ده.