تاند (پنجشنبه، د زمري/ اسد ۲۲ مه) د ملي مقاومت جبهې اعلان کړی چې د بدخشان د مرکز فیضاباد ښاروال د دې جبهې د ځواکونو په بمي برید کې وژل شوی دی. دې جبهې په یوه خبرپاڼه کې ویلي چې په برید کې د طالبانو د ښاروال ساتونکي هم وژل شوي دي.
بي بي سي پښتو هم د طالبانو د یوه چارواکي په قول، چې نوم یې نه دی یاد کړی، پېښه تایید کړې ده.
د دغه چارواکي په وینا، نن پنجشنبه په ځايي وخت څه کم دوې بجې مقناطیسي ماین د هغه موټر ته کېښودل شوی چې په پایله کې یې خپله ښاروال وژل شوی او یو بل همکار یې ټپي شوی دی.
د ملي مقاومت جبهې ویلي چې برید د بدخشان د والي د دفتر له ودانۍ څخه شاوخوا ۱۰۰ متره لېري شوی دی.
د فیضاباد ښاروال عبدالرحمن منصور موټر د پنجشنبې په غرمه، د زمري په ۲۲مه، په زاړه ښار کې د چاودنې له امله په نښه شو. د دغه طالب چارواکي هایلکس موټر د چاودنې له امله اور واخیست او له منځه لاړ.
د فیضاباد ښاروال عبدالرحمن منصور، د میدان وردګ ولایت اوسېدونکی و.
دا پېښه په داسې حال کې شوې چې له دوو ورځو راهیسې د بدخشان په نسي ولسوالۍ کې د طالبانو او د دې ډلې د یوه سیمهییز ناراضي قوماندان ترمنځ جګړه روانه ده.
په تېرو دوو اوونیو کې دا په بدخشان کې د طالبانو پر یوه لوړپوړي چارواکي دوهم برید دی.
د روانې میاشتې په شپږمه نېټه د بدخشان د اطلاعاتو او کلتور رئیس ذبیحالله امیري هم وژل شوی و. د طالبانو پولیسو ویلي وو چې امیري خپل دفتر ته د تګ پر مهال د بهارک ـ فیضاباد پر لاره د دوو موټرسایکل سپرو په برید کې وژل شوی و.