تاند ( یکشنبه د زمري ـ اسد ۱۱مه) د افغانستان پخواني ولسمشرحامدکرزي، په پاکستان کې د افغان محصلینو د ځورونې او د هغوی د ویزو له تمدید څخه د پاکستاني حکومت د انکار په تړاو خپاره شوي راپورونه د خواشینۍ او اندېښنې وړ بللي دي.
حامدکرزي په یوه پیغام کې ویلي چې، افغان محصلین یوازې د علم زده کړې او خپلو زدهکړو د بشپړولو لپاره پاکستان ته تللي دي او باید د هغوی د اوسېدنې موضوع له نورو مسایلو څخه جلا وبلل شي.
پخواني ولسمشر له پاکستاني اړوندو چارواکو غوښتي چې له افغان محصلینو سره دې په اکاډمیک چاپېریال کې د معمول اصولو او معیارونو له مخې چلند وکړي.
ښاغلي کرزي زیاته کړې چې، پاکستانی حکومت باید افغان محصلینو ته دې د خپلو زدهکړو د دوام زمینه برابره کړي.
کارپوهان وایي، افغان محصلین د علم او زدهکړو لپاره له هېواده بهر تللي، نه د کومې ستونزې د رامنځته کولو لپاره.
دوی زیاتوي چې، د هغوی له زدهکړو سره مرسته او د ویزو او اقامې ستونزو حل کول د دواړو هېوادونو په ګټه دي.
کارپوهانو هیله ښودلې چې، پاکستاني چارواکي له افغان محصلینو سره انساني او اکاډمیک چلند وکړي او هغوی ته د خپلو زدهکړو د بشپړولو زمینه برابره کړي.