تاند (شنبه د اسد/زمري ۱۰مه) د افغانستان د فوټبال فدراسیون مسوولانو نن شنبه د کانټیننټال فوټسال جام سیالیو لپاره د افغانستان د فوټسال ملي لوبډلې د ټولو لوبو بشپړ مهالوېش اعلان کړ.
د اعلان له مخې، د افغانستان د فوټسال ملي لوبډله به خپله لومړۍ لوبه سبا یکشنبه د کابل پر وخت د ماښام په ۶:۰۰ بجو د تایلنډ د ملي لوبډلې پر وړاندې ترسره کړي.
افغان فوټسال لوبغاړي به له دې وروسته د روانې اوونۍ په دوشنبه، چهارشنبه او پنجشنبه په ترتیب سره د ویتنام، روسیې او نیوزیلنډ له ملي لوبډلو سره هم سیالۍ وکړي.
د کانټیننټال فوټسال جام سیالۍ د تایلنډ په کوربتوب او د پنځو هېوادونو په ګډون ترسره کېږي.
ټاکل شوې چې دغه سیالۍ په ژوندۍ او قانوني بڼه په افغانستان کې د AF Sport نړیوالې شبکې له لارې خپرې شي.
د کانټیننټال جام سیالۍ د افغانستان د فوټسال ملي لوبډلې لپاره د نړیوالو تجربو د زیاتولو او د خپلو وړتیاوو د ښودلو یو مهم فرصت ګڼل کېږي.
افغان مینهوال هیله لري چې ملي لوبډله به د پیاوړو سیالانو پر وړاندې ښې لوبې وکړي او د هېواد لپاره ویاړلې پایلې ترلاسه کړي.