تاند (دوشنبه د چنګاښ/سرطان ۲۹مه) د نورستان د والي ویاند، فریدون صمیم رسنیو ته ویلي چې، په پارون ښار کې د نننیو سېلونو له امله د دوو کورنیو سیلانیانو په ګډون ۱۰۵ تنه بې درکه دي.
د صمیم په خبره، په نادرکه شویو کسانو کې د پارون ښاروال او د هغه دوه ساتونکي هم شامل دي.
صمیم زیاتوي، تر اوسه یوازې د ۹ کسانو جسدونه موندل شوي دي.
دا سېلونه چې له سختو ورښتونو وروسته راوتلي، د پارون ښاروالۍ ودانۍ، مېلمستون او ګڼ شمېر دوکانونه ویجاړ کړي دي.
په ورکو شویو پسې د لټون عملیات روان دي.
تازه له نورستانه ځينو سرچینو بیا تاند ته وویل چې، د پارون د ښاروال او شپږ ملګرو جسدونه یې هم وموندل شول.
سېل د ښاروالۍ ودانۍ او همداراز د لومړي کنډک ودانۍ او تاسیسات یومخ ویجاړ کړي دي.
د نورستان والي له مرکز څخه د فوري مرستې غوښتنه کړې ده.
هره شېبه د بې درکه شویو کسانو مړي موندل کېږي او ځايي اوسیدونکي وايي چې تراوسه د شاوخوا ۴۰ تنو مړي موندل شوي دي.
دا سېلونه د دوشنبې د ماسپښین له درو بجو پیل شو او د هوا اټکل ښيي چې سبا به هم بارانونه دوام وکړي.
سېلونو کې د نورستان د پارون ښاروال له کارکوونکو او د لومړي کنډک قوماندان لادرکه دي
دا سېلونه په داسې مهال راوتلي چې، تازه د هوا پېژندنې ادارې ویلي چې، سبا سېشنبه د چنګاښ ۳۰مه په ۱۰ ولایتونو کې د تېز باران، تېزو بادونو، دوړو او سېلابونو راوتو اټکل شته دی.
دغې ادارې د یوې خبرپاڼې په خپرولو سره ویلي چې په دغه اټکل کې بدخشان، نورستان، کونړ، لغمان، ننګرهار، لوګر، پکتیا، خوست، پکتیکا، او غزني ولایتونه شامل دي.