تاند (دوشنبه د چنګاښ/سرطان ۲۹مه) د نورستان ځايي چارواکي وایي، د نن ورځې سېلابونو کې د پارون ښاروال او کارکوونکي او په دې ولایت کې د لومړي کنډک قومندان سېلونو وړي او جسدونه یې بې درکه دي.
له سیمې ویډیوګانې ښيي چې د پارون د ښاروالۍ ودانۍ او د لومړي کنډک قرارګاه په مکمل ډول ویجاړه شوې ده.
د نورستان والي زین العابدین عابد له رسنیو سره په خبرو کې منلې چې د پارون ښاروال او د لومړي کنډک قوماندان له خپلو همکارانو سره ورک شوي دي.
نوموړی وايي چې دوی په سیمه له خټو او خاورو څخه د جسدونو را ایستل پیل کړي او هڅه کوي چې دولتي کارکوونکي هم پېدا کړي.
تازه د نورستان د کلتور ریاست کارکوونکي فضل الحق خالقیار په خپله فېسبوک پاڼه لیکلي چې، د کنډک قومنداان او د ښاروالۍ یوه تن مدیر چې اوبو وړي وو جسدونه یې وموندل شول، خو د نورو جسدونه لا ورک دي.
تر اوسه په دې سېلونو کې د اوښتې مرګ ژوبلې کره شمېر له رسنیو سره نه دی شریک شوی خو، عیني شاهدان له تاند سره په خبرو کې وایي چې، لسګونه کسان اوبو وړي او تر خاورو لاندې دي.
دوی زیاتوي چې، تر دې دمه د ۴۳ کسانو جسدونه موندل شوي دي او د نورو لټون روان دی.