تاند (چهارشنبه د چنګاښ/سرطان ۱۷مه) د روغتیا نړیوال سازمان د ختیځې مدیترانې سیمې رییسې، حنان بلخي، پر اېکس لیکلي چې افغانستان ته یې د پولیو د څارنې بورډ د پلاوي په مشرۍ د سفر پر مهال له طالب چارواکو، روغتیايي کارکوونکو، د ملګرو ملتونو ادارو او شریکانو سره کتلي دي.
هغې ویلي، د هر ماشوم واکسین ته لاسرسی باید د عادي واکسیناسیون، د بنسټیزو روغتیايي خدمتونو د دوام او د یو پیاوړي او با ثباته روغتیايي سیسټم له جوړولو سره یو ځای پر مخ ولاړ شي.
حنان بلخي ټینګار کړی چې، سره له شته ننګونو، د افغان لوري ژمنتیا هیلهبښونکې ده.
نوموړې وایي،په دغو روانو ګډو هڅو به افغانستان د پولیو له ناروغۍ پاک راتلونکی ولري.
دا په داسې حال کې ده چې، افغانستان او پاکستان د نړۍ دوه هغه هېوادونه دي چې، لاهم د پولیو له ناوړه ناروغۍ رنځېږي.
تازه د هلمند په لښکرګاه ښار او نهر سراج، موسی کلا، واشېر، نادعلي/ مارجه ولسوالیو او د کندهار په مرکز کې د پولیو یا ګوزڼ ضد واکسین دوام لري.