تاند (دوشنبه د چنګاښ/سرطان ۱۵مه) د بالیووډ مشهور لوبغاړي عامرخان چې، د بریالیو او پیغاملرونکو فلمونو له امله نړیوال شهرت لري، د درېیم ځل لپاره واده وکړ.
هغه له ګوري سپراټ Gauri Spratt سره خپل نوی ګډ ژوند پیل کړ.
د عامر خان او ګوري سپراټ د واده مراسم د یکشنبې په ورځ په یوه صمیمي فضا کې د کورنۍ د غړو او نږدې دوستانو په حضور کې ترسره شول.د بالیووډ د ډېرو مجللو او پرتمینو ودونو برعکس، دې جوړې پرېکړه کړې وه چې خپل واده په محدود ډول ونمانځي.
د راپورونو له مخې، شاوخوا ۱۵۰ مېلمانه په دې مراسمو کې ګډون درلود او د دوی یو شمېر خپلوان له هند څخه بهر هم د واده د ګډون لپاره ممبۍ ته راغلي وو.
د عامر خان اولادونه، جنید خان، ایرا خان او ازاد راو خان هم په دې مراسمو کې حاضر وو.
دغه راز د ګوري سپراټ شپږ کلن زوی، چې د هغې له پخواني واده څخه دی، هم د مېلمنو په منځ کې لیدل شوی و.
عامر خان لومړی ځل د خپلې شپېتمې کلیزې د نمانځنې پر مهال له رسنیو سره د ګوري سپراټ سره خپله اړیکه په رسمي ډول شریکه کړه. ویل کېږي چې دوی نږدې ۲۵ کاله یو بل پېژني، خو د مینې اړیکه یې شاوخوا دوه کاله مخکې پیل شوې ده.
دا د عامر خان درېیم واده دی.
هغه تر دې وړاندې له رینا دوتا سره واده کړی و چې دوه اولادونه ترې لري. له هغې تر جلا کېدو وروسته یې له هندي فلم جوړونکې کیرن راو سره واده وکړ او د دوی یو زوی، ازاد راو خان، وزېږېد.
که څه هم د دوی ګډ ژوند پای ته رسېدلی، خو دواړه لا هم د خپل زوی د پالنې ګډ مسئولیت پر غاړه لري.
ګوري سپراټ، چې د بنګلور اوسېدونکې ده، د فېشن او ښکلا په برخه کې فعالیت کوي او په ممبۍ کې د ښکلا د یوه سالون مشري کوي.
عامرخان د هند د سینما له تر ټولو پېژندل شوو لوبغاړو او فلم جوړونکو څخه دی. هغه د 3 Idiots، Dangal او PK په څېر مشهورو فلمونو کې د خپل هنري استعداد له امله نړیوال شهرت ترلاسه کړ او شخصي ژوند یې هم تل د رسنیو او د بالیووډ د مینهوالو د پام وړ پاتې شوی دی.