تاند (جمعه، د چنګاښ/ سرطان ۱۲مه) پر افغانستان د پاکستان له خونړیو بریدونو سره سره چې ګڼ شمېر ملکیانو ته یې مرګ ژوبلې اړولي، د امریکا د بهرنیو چارو وزارت ویلي، واشنګټن د ترهګریزو بریدونو پر وړاندې د پاکستان د ځان د دفاع د حق ملاتړ کوي.
د امریکا د بهرنیو چارو وزارت د پنجشنبې په ورځ ویلي: «د پاکستان خلکو د ترهګرو له لاسه ډېر کړاوونه ګاللي دي.»
دا څرګندونې وروسته له هغې کېږي چې د افغانستان لپاره د ملګرو ملتونو مرستندوی ماموریت (یوناما) د دوشنبې په ورځ وویل، د پاکستان په وروستیو هوايي بریدونو کې، چې د افغانستان په درو ولایتونو کې وشول، لږ تر لږه ۲۸ ملکي وګړي وژل شوي او ۴۹ نور ټپیان دي.
طالبانو وروسته وویل چې د پاکستان پر خاوره یې هوايي بریدونه کړي، خو اسلام اباد ویلي چې امنیتي ځواکونو یې په بلوچستان ایالت کې د څلورو بېپیلوټه الوتکو (ډرونونه) بریدونه شنډ کړي دي.
د رویټرز خبري اژانس د راپور له مخې، افغانستان او پاکستان، چې پخوا متحدان وو، د روان کال په فبرورۍ کې د وروستیو کلونو تر ټولو سختې نښتې وکړې.
رویټرز لیکلي، پاکستان اتومي وسلې لري او پوځي وړتیاوې یې د افغانستان پرتله ډېرې پیاوړې دي، خو طالبان، چې له ۲۰۲۱ کال راهیسې په افغانستان کې واکمن دي، د چریکي جګړو پراخه تجربه لري او له کلونو جګړې وروسته بېرته واک ته رسېدلي دي.
راپور زیاتوي چې پاکستان د امریکا یو مهم غیر ناټو متحد دی او د ډونالډ ټرمپ له بېرته واک ته رسېدو وروسته د واشنګټن او اسلام اباد اړیکې هم ښې شوې دي. همداراز، پاکستان د امریکا او اسراییل ترمنځ له ایران سره د جګړې د پای ته رسولو په هڅو کې د منځګړي رول هم لوبولی دی.
خو امریکا په افغانستان کې د لوېدیځو ځواکونو د ۲۰ کلن اشغال په موده کې پاکستان د طالبانو په ملاتړ او له امریکا سره په دوه مخۍ تورناوه.
اسلام اباد پر طالبانو تور لګوي چې هغو وسلهوالو ته یې پناه ورکړې چې په پاکستان کې د بریدونو پلان جوړوي، خو طالبان دا تورونه ردوي او وایي چې ناامني د پاکستان کورنۍ ستونزه ده او اسلام اباد د خپلو امنیتي ناکامیو پړه پر افغانستان اچوي.