تاند (دوشنبه، د چنګاښ/ سرطان ۸ مه) په داسي حال کې چې پاکستان د افغانستان بمبارویو ته دوام ورکوي، ایران وايي، له افغانستان سره سوداګري راکړه ورکړه ۱۰ میلیاترد ډالرو ته رسوي.
د مهر خبري اژانس د راپور له مخې، د ایران د سوداګرو د چارو یوه چارواکي ویلي، ایران او افغانستان پلان لري چې په راتلونکو درېیو کلونو کې د دواړو هېوادونو ترمنځ کلنۍ سوداګري ۱۰ میلیارډ ډالرو ته ورسوي.
په کابل کې د ایران سوداګریز استازي، حسین روستایي، د دوشنبې په ورځ وویل چې د تېر لمریز کال په ترڅ کې د دواړو هېوادونو ترمنځ د سوداګرۍ کچه ۲.۷ میلیارډ ډالرو ته رسېدلې ده. د هغه په وینا، افغانستان دا مهال د ایران پنځم لوی سوداګریز شریک هېواد دی.
روستایي زیاته کړه، دواړه هېوادونه غواړي د صنعت او کانونو په برخو کې د همکارۍ د پراخولو له لارې په راتلونکو درېیو کلونو کې د ۱۰ میلیارډ ډالرو سوداګرۍ هدف ته ورسېږي.
دا څرګندونې د تهران او کابل ترمنځ د اقتصادي اړیکو د پیاوړتیا نښه بلل کېږي. ایران افغانستان ته سونګ، ساختماني مواد، خوراکي توکي او صنعتي محصولات صادروي، او افغانستان د منځنۍ اسیا بازارونو ته د ایراني محصولاتو د لېږد یوه مهمه ځمکنۍ ترانزیټي لار ګڼل کېږي.