ولسونه د رهبرۍ له امله لوړېږي او هم غورځي

شاه زلمی

په نړۍ کې د هر ملت د پرمختګ، سوکالۍ او یا هم وروسته پاتې کېدو تر شا بېلابېل عوامل موجود وي، خو له دغو ټولو څخه تر ټولو مهم عامل ښه او اغېزمنه رهبري ده. رهبر د ټولنې د لارښود، تنظیموونکي او الهام بښونکي په توګه د ولس پر برخلیک ژور اغېز لري. که چېرې رهبر د پوهې، عدالت، صداقت او ولسپالنې خاوند وي، ملتونه د پرمختګ لوړو پوړیو ته رسېږي، خو که رهبران بې کفایته، ځان غوښتونکي او ناعادله وي، نو ولسونه له بېلابېلو ستونزو، شخړو او وروسته پاتې کېدو سره مخ کېږي.

د رهبرۍ ارزښت یوازې تر سیاسي نظام پورې محدود نه دی، بلکې د انسان د ژوند په هره برخه کې مهم رول لري. د کورنۍ مشر، د ښوونځي استاد، د ادارې مسؤل او د هېواد سیاسي رهبر ټول د رهبرۍ بېلابېل مثالونه دي. هر څومره چې رهبري سالمه او اغېزمنه وي، هماغومره یې اغېزې مثبتې او دوامدارې وي

هغه ولسونه چې د غوره رهبرانو تر سیوري لاندې ژوند کوي، خلک یې د امن، عدالت او هوساینې احساس کوي.

  داسې رهبران د ولسونو ترمنځ د یووالي، همکارۍ او متقابل درناوي فضا رامنځته کوي. همدارنګه، په نړیوال ډګر کې هم د عزت او وقار څښتنان وي، ځکه ښه رهبري د ملتونو حیثیت لوړوي او د پرمختګ دروازې ورته پرانیزي.

برعکس، کله چې رهبران شخصي ګټې د ولس له ګټو پورته وبولي، فساد، بې عدالتي او اختلافات ډېرېږي. په داسې حالاتو کې نه یوازې د خلکو باور له منځه ځي، بلکې اقتصادي، ټولنیز او سیاسي بحرانونه هم رامنځته کېږي. تاریخ ګواه دی چې ډېری ملتونه د ناسمو رهبرانو له امله کمزوري شوي او له پرمختګ څخه پاتې شوي دي.

ښه رهبر هغه څوک دی چې د ولس درد درک کړي، د خلکو ستونزو ته غوږ ونیسي او د راتلونکي لپاره روښانه لید ولري. رهبر باید د واک پر ځای خدمت ته لومړیتوب ورکړي، ځکه اصلي رهبري د ولس په زړونو کې ځای پیدا کول دي، نه یوازې پر چوکیو واکمن کېدل.

په پایله کې ویلای شو چې د ملتونو بریا او ناکامي تر ډېره د هغوی له رهبرۍ سره تړاو لري. که ولسونه د پوهې، عدالت او صداقت لرونکي مشران وټاکي، راتلونکی به یې روښانه وي، خو که د احساساتو او شخصي اړیکو پر بنسټ پرېکړې وکړي، نو ستونزې به یې ډېرې شي. له همدې امله، د غوره رهبر ټاکنه د غوره راتلونکي تضمین کوي.

لیکوال:شاه زلمی