تاند (چهارشنبه د ثور/ غويي ۲۳مه) پښتون سیاستوال افراسیاب خټک د پښتونخوا په سویلي ولسوالیو کې د ناامنۍ د زیاتېدو په اړه سخت غبرګون ښودلی دی.
خټک په یوه تازه شننه کې ویلي چې پاکستان نشي کولای په دغو سیمو کې د خپلې بې وسۍ له مسوولیته ځان خلاص کړي.
هغه په دې شننه کې اوسنی وضعیت له تېرو تجربو سره پرتله کړی او د پاکستان د حکومت په روانو تګلارو یې نیوکه کړې ده.
نوموړي په ټینګار سره ویلي چې، د پښتونخوا په ډېری سویلي ولسوالیو کې د مرکزي حکومت واک ختمېدل یو جدي ناورین دی او ریاست باید د دې وضعیت مسوولیت ومني.
نوموړي په دې شننه کې د ۲۰۰۳ او ۲۰۱۴ کلونو ترمنځ ترسره شوي د پاکستان پوځي عملیات هم نمایشي او جعلي بللي او په توندو الفاظو یې لیکلي چې،په تېرو لسو کالو کې دغو پوځي عملیاتو په پخوانیو قبایلي سیمو کې د تحریک طالبان پاکستان ان د یوې ولسوالۍ امیر ته هم زیان ونه رساوه.
افراسیاب خټک په داسې مهال دا شننه خپروي چې، په دې وروستیو کې د پښتونخوا په ډېری سيمو کې ناامنۍ زور اخيستی او خلک یې لاریونونو ته اړ کړي دي.