تاند (سه شنبه د ثور/ غويي ۲۲مه) په افغانستان کې د طالبانو د حکومت د مخابراتو او معلوماتي تکنالوژۍ وزارت ویاند د رسنیو هغه راپورونه رد کړل چې، ګواکې دوی پر عامو خلکو د وایفای انټرنیټي خدمات بندوي.
له تېرو دوو ورځو راهیسې داسې راپورونه خپرېږي چې، په کې ویل کېږي د یاد وزارت نوي وزیر پرېکړه کړې چې په کابل کې پر عامو خلکو د وایفای انټرنیټي خدمات بند کړي او دا لړۍ همداسې نورو ولایتونو ته هم وغځوي.
خو د دې راپورونو په غبرګون کې بیا د مخابراتو او معلوماتي تکنالوژۍ وزارت ویاند عنایت الله الکوزي رسنیو سره په خبرو کې دا اوازې رد کړې.
هغه ویلي چې،په دې تړاو تر اوسه هېڅ خبر نه د شوې او خپرې شوې اوازې بې اساسه دي.
د دې خبرونو خپرېدو سره هغه خلک چې له دې انټرنیټ نه ګټه اخلي سخت اندېښمن وو او خواله رسنیو کې یې غبرګونونه ښودلي وو.
د تکنالوژۍ پوهان بیا په اوسنۍ پرمختللي دور کې د پرمختګ لپاره انټرنیټ یو اساسي اړتیا یادوي او له حاکم نظام نه غواړي چې، په دې برخه کې د محدودیتونو پرځای ځوانانو ته زمینې برابرې کړي.