تاند (یکشنبه د ثور/ غويي ۱۳مه) د افغانستان لپاره د ملګرو ملتونو د بشري حقونو شورا ځانګړي راپور ورکوونکي ویلي چې ازادې رسنۍ، د بیان ازادي او اطلاعاتو ته لاسرسی د یوې سولهییزې او فعالې ټولنې بنسټیز عناصر دي.
ریچارډ بنټ دا خبرې نن یکشنبه د مې۳مه د مطبوعاتو ازادۍ نړیوالې ورځې په مناسبت پر خپله اېکسپاڼه لیکلي دي.
بنېټ ویلي، افغانستان کې خبریالان اطلاعاتو ته د لاسرسي حق په تامین کې مهم رول لري.
د مې ۳مه په ۱۹۹۳ کال کې د ملګرو ملتونو عمومي اسامبلې له لوري د مطبوعاتو د ازادۍ ارزښت په اړه د پوهاوي لوړولو او د بیان ازادۍ ته د دولتونو د ژمنتیا یادونې په موخه، د مطبوعاتو نړیوالې ورځې په توګه نومول شوې ده.
دا ورځ په داسې مهال بیا نمانځل کېږي چې په افغانستان کې رسنۍ او خبریالان په ځانګړي ډول ښځينه خبریالانې او د رسنیو کارکوونکې تر بل هر وخت فشار لاندې دي او له سختو محدودیتونو سره مخامخ دي.