تاند (چهارشنبه د وري – حمل ۱۹مه) افغانستان کې د طالبانو د حکومت پېښو سره د مبارزې چمتووالې ادارې مسوولانو ویلي چې، په ټول هېواد کې د وروستیو ورښتونو او سېلونو له امله په تېرو ۲۴ ساعتونو کې ۳۳ کسانو ته مرګ ژوبله اوښتې ده.
د یادې ادارې ویاند، محمدیوسف حماد وايي، په تېرو ۲۴ ساعتونو کې د هېواد په کچه د ورښتونو، سېلابونو، غرښوېدنې او د کورونو نړېدو له امله ۱۵ کسان مړه شوي، ۱۸ ټپيان شوي او یو تن لا هم نادرکه دی.
د هغه په خبره، روانه اونۍ هم د هېواد په ګڼو ولایتونو کې د سختو ورښتونو او سېلابونو راوتلو اټکل شوی دی.
د یوه بل خبر له مخې بیا د سالنګ لویه لار چې د واروې له امله تړل شوې وه اوس د مسافر وړونکو موټرو پرمخ خلاصه شوه.
د طالبانو د ټولګټو چارو وزارت ویلي چې، هڅه کوي د بار وړونکو موټرو پرمخ هم دغه لاره ژر پرانیزي.