تاند (سې شنبه، د وري/ حمل ۱۸ مه) د امریکا د متحدوایالتونو ولسمشر ډونالډ ټرمپ یو ځل بیا ټینګار وکړ چې هغه ضربالاجل چې ده ټاکلی (د سېشنبې تر شپې، د امریکا پر وخت) وروستی دی، او هر ډول تړون باید تر همدې وخته وشي.
هغه څو شېبې مخکې وویل: «موږ تر ټولو غوره پلان لرو، خو زه تاسو ته نه وایم چې زما پلان څه دی. موږ د پلان هره برخه په دقت سنجولې ده، خو رسنیو ته یې نه شم افشا کولی.»
کله چې له ټرمپ څخه وپوښتل شول چې آیا هغه به له دې سره موافق وي چې ایران د هرمز تنګي له لارې د بېړیو له تګ راتګ څخه فیس واخلي، هغه وویل:
«ولې موږ فیس وانخلو؟ موږ د جګړې ګټونکي یوو، موږ جګړه ګټلې ده، ولې موږ فیس وانخلو؟ ځکه چې موږ بریالي یوو. موږ له پوځي اړخه جګړه ګټلې ده.»
هغه دا هم وویل چې که یوازې له حکومت سره تړون وشي، دا ورته کافي دی، او زیاته یې کړه: «له ایران سره تړون زما لپاره بس دی، همدا د منلو وړ دی، د تېلو ازاد جریان باید بېرته پیل شي.»
ټرمپ په پای کې یو ځل بیا خپل ۲۴ ساعته ضربالاجل یاد کړ او ګواښ یې وکړ چې که ایران له امریکا سره موافقه ونه کړي،
«د ایران ټول پلونه به د شپې تر ۱۲ بجو پورې ویجاړ شي، بشپړ تخریب، یوازې په څلورو ساعتونو کې، البته موږ نه غواړو دا کار وکړو.»
هغه د کرج د «بي ۱» پُل د چاودنې په اړه وویل: «موږ تړون ته ډېر نژدې وو چې سټیو ویتکاف او جرد کوشنر راته وویل چې هغوی له تړونه شا ته کېږي، نو ما وویل د هغوی تر ټولو لوی پل وولئ.»
ټرمپ ګواښ وکړ چې که تړون ونه شي، امریکا به ایران داسې سخت وځپي چې «د (د دغه) هېواد بیا رغونه به سل کاله وخت ونیسي.»