تاند (دوشنبه د وري – حمل ۱۷مه) د ناسا د ارتېمیز۲ ماموریت څلور ستورمزلي د دوشنبې په سهار د سپوږمۍ د جاذبې ساحې ته ورننوتل.
د مالوماتو له مخې هغوی به ډیر ژر د سپوږمۍ لرې ساحې ته ولاړ شي او د تاریخ تر ټولو لرې تللي انسانان به شي.
په دغو ستورمزلو کې ریډ ویسمن، ویکتور ګلوور، کریسټینا کوچ او کاناډایي جیرمي هنسن شامل دي.
دوی خپل دغه ماموریت تېره اونۍ د امریکا له فلوریډا ایالت څخه پیل کړی دی.
د رسنیو د راپورونو له مخې دغه ستور مزلي به د دوشنبې په ورځ د شپږمې ورځې لپاره تر ماښام پورې د ماموریت تر ټولو لرې فاصلې ته ورسیږي، چې شاوخوا ۲۵۲,۷۵۷ ميله لرې ده.
د سپوږمۍ د جاذبې په سیمه کې د سپوږمۍ ځواک د کپسول پر حرکت محسوسېږي.
د سپوږمۍ جاذبه د ځمکې د جاذبې شاوخوا ۱/۶ برخه ده چې، په دې سیمه کې د سپوږمۍ کشش ستورمزلو او کپسول ته اجازه ورکوي چې په نیمه وزن حرکت وکړي.
دا ځانګړې جاذبه ستورمزلو ته د سپوږمۍ شاوخوا حرکت او د تیاره اړخ د څیړلو زمینه برابروي.
د مالوماتو پر اساس دا سفر شاوخوا شپږ ساعته دوام کوي او ستورمزلي به د اوریون کړکۍ له لارې د سپوږمۍ ځانګړې، یا ټاکلې برخې انځورونه واخلي.
دغه ستورمزلي به د سپوږمۍ په شاوخوا کې۱۰ورځنی سفر بشپړوي.
په ستراتیژیکه کچه، آرتمیس ۲ د امریکا او چین ترمنځ د نوې فضايي سیالۍ یوه برخه ده، ځکه دواړه هېوادونه غواړي په سپوږمۍ او له هغې هاخوا خپل اوږدمهاله حضور ټینګ کړي.
د دې ماموریت بریالیتوب کولی شي د ناسا پر نوو بنسټیزو سیستمونو باور زیات کړي او د راتلونکو انسانلېږدوونکو ماموریتونو لپاره لاره هواره کړي، چې پکې د سپوږمۍ پر سطحه ښکته کېدل او حتی تر مریخه راتلونکي سفرونه شامل دي.