تاند (دوشنبه د وري – حمل ۱۰مه) ایراني رسنیو د ایران د بهرنیو چارو وزارت د ویاند، اسمعیل بقايي له قوله خپرو کړو راپورونو کې لیکلي چې، له امریکا سره یې هیڅ ډول مخامخ خبرې نه دي کړي.
بقايي زیاته کړې چې، کومې غوښتنې هغوی ته په نامستقیم ډول رسېدلې دي، افراطي او غیرمنطقي دي.
بقايي ویلي، کومې غونډې چې پاکستان جوړې کړې دي، د هغوی خپل چوکاټ دی او ایران پکې هیڅ ګډون نه دی درلودلی.
پاکستان تېره ورځ د امریکا-اسراییل او ایران د روان کړکېچ په اړه د خبرو لپاره د سعودي عربستان، مصر او ترکیې د بهرنیو چارو وزیرانو کوربه و.
د رسنیو د راپورونو له مخې د اسلام آباد په څلور اړخیزه ناسته چې د پاکستان په کوربه توب جوړه شوې وه، په کې د ګډونوالو لهخوا په منځني ختیځ کې د جګړې د پای او د هرمز تنګي پر بیا پرانیستې ټینګار وشو.
د پاکستان د بهرنیو چارو وزیر د دې ناستې په پای کې یوځل بیا ټینګار کړی چې، هېواد یې د ایران او امریکا ترمنځ د خبرو لپاره کوربتوب ته چمتو دی.
د اسلاماباد په څلور اړخیزه ناسته کې د سیمې د کړکېچ پر پای ټینګار شوی