مولوي هدایت الله (هدایت)
د نجونو د ښوونځیو پنځم کال بیا رادباندې شو خو د مشر ملا صاحب د امر الثاني موده همداسي نه رارسي، په افغانستان کې د نجونو د تعلیم مخنیوی په حقیقت کې د عیسويانو د شریعت پر بنسټ ترسره کیږي، البته په ناپوهي کې. په عیسوی دین کې د – رسول پولوس لیکونه – د عیسویانو دپاره د مقدس کتاب (بائبل) یوه برخه جوړوي چې بعد له انجیل څخه دوهم ځای لري.
د ښځو په کور کښینول او تعلیم نه کول – د عیسوي کلیسا حکمونه دي. د عیسویانو د (کورنتیانو په نوم، د پولوس په لومړي لیک، ۱۴باب، ۳۴-۳۵ آیتونه) کې راغلي:«ښځې دې غلي کښېني، هغوی ته د خبرو کولو حکم نسته دی بلکه د شریعت مطابق دې تابع دارې واوسي- او که هغوی په څه خبره ځان پوهول غواړي نو له خپلو خاوندانو څخه په کور کې تپوس کولی سي.»
بل ځای وايي: «ښځې دې په خاموشی او په پوره تابع دارۍ سره [دا] زده کاندي. او زه اجازه نه ورکوم چې زنانه دې تعلیم ورکړي یا دې په خاوندانو حکم وچلوي، بلکه غلي دې پاته سي. ځکه چې لومړی آدم پیدا کړای سو، له هغه نه وروسته حوا. او ادم دوکه نه سو، بلکه ښځه په دوکه کې پریوتله او ګناه ګاره سوه.» (د تیموتیوس پولوس لیک، لومړی کتاب ۲باب،۱۱-۱۴آیتونه)
مسیحي دیني پوهانو د دغو آیتونو دپاره څو قسمه تفسیرونه پیش کړي دي، دوی غواړي دغه آیتونه منسوخ یا پر هماغه زمانه پورې محدود کړي خو دغه آیتونه تفسیر ته اړتیا نه لري د ښځو د محرومیت هر څه په کې څرګند دي.
د طالبانو مشر ملا صاحب او هغه کسان چې د نجونو د تعلیم مخالف دي باید خبردار شي چې د اسلامي مقدس شریعت پر خلاف، د عیسویانو دیني احکام عملي کوي.
موږ له مشر ملا صاحب او د هغه ډلې څخه غواړو چې د خدای روی ته وګوری چې د ښوونځیو دروازې د اسلامي شریعت په چوکاټ کې پرانیزي، له الله ج څخه وډار شي، د کلیسا کفري حکم مه پلي کوي.
تاسو په دې کار سره په نه بخښل کیدونکې ګناه سره مخ یاست.